Oxota dengizining “Uzoq Sharq” trauleri cho‘kib ketgan akvatoriyasida qidiruv-qutqaruv operatsiyasi davom etmoqda, deb yozadi Rossiya favqulodda vaziyatlar vazirligi matbuot xizmati.
Baliqchilik kemalari tomonidan 63 kishi qutqarilgan, ularning 7 nafari og‘ir ahvolda. Shuningdek suvdan 54 kishining jasadi chiqarib olindi.
Vazirlik trauler yo‘lovchi va ekipaji to‘liq ro‘yxatini e’lon qildi. Undan asli buxorolik Abdullayev Farhod Sa’dullayevich ham o‘rin oldi. Uning lavozimi birinchi sinf matrosi deb ko‘rsatilgan.
Eslatib o‘tamiz, avvalroq Oxota dengizidagi “Uzoq Sharq” trauleri (baliq ovlaydigan dengiz kemasi) halokatga uchragan joyda qidiruv-qutqaruv operatsiyasiga jalb qilinganlar soni deyarli ikki marta —1,4 ming kishigacha ko‘paytirilgani xabar berilgan edi.
“Uzoq Sharq” katta avtonom trauleri 2-aprel, payshanbaga o‘tar kechasi Oxota dengizi akvatoriyasida Magadandan 300 km masofada cho‘kib ketdi. Kema bortida, dastlabki ma’lumotlarga ko‘ra, 78 nafar rossiyalik va 54 nafar xorijlik bo‘lgan.
Izoh (0)