Мутахассислар Airbus қулаган ҳолатни қайта тиклади (видео)

European Flight Simulator мутахассислари 24 март куни Франция жанубида Airbus А320 самолётининг ҳалокатга учраш ҳолатини қайта тиклади, деб хабар бермоқда «Lavenir.net».

https://www.youtube.com/watch?v=jd3J2B6I98I

Қулаш жараёни саккиз дақиқага яқин давом этган, симуляция Boeing самолётлари кабинасида амалга оширилган. Airbus парвозининг маълумотлари «Flightradar24.com» сайтидан олиниб, симулятор дастурига киритилгач, парвознинг айнан қандай давом этганини кўрсатиб берган.

Симуляция вақт, тезлик ва баландлик бўйича энг аниқ кўрсаткичлар билан амалга оширилган. Натижада қулаш жуда секин содир бўлгани аниқланиб, учувчи самолётни атайлаб пасайтиргани ҳақидаги тахминларга далил бўлмоқда.

Аввалроқ Airbus А320 самолётининг иккинчи учувчиси атайлаб ҳаво кемаси командирига кабина эшигини очмагани маълум бўлган эди. «Қора қути»дан олинган ёзувда учувчи қайтадан кабинага кирмоқчи бўлгани, бироқ буни уддалай олмаганини эшитиш мумкин. Учувчи дастлаб эшикни секин тақиллатган, сўнг қаттиқроқ урган, шундан кейин эса эшикни уриб синдирмоқчи бўлган, бироқ уддалай олмаган. Охир-оқибат у кабинага кира олмаган.

Эслатиб ўтамиз, 24 март куни Барселонадан Дюссельдорфга парвоз қилаётган Airbus А320 самолёти Франция жанубида, Алп тоғлари устида ҳалокатга учраши оқибатида лайнер бортида бўлган 150 кишининг барчаси ҳалок бўлган эди.