Germanwings авиакомпанияси самолёти ҳалокатида айбдор деб ҳисобланаётган учувчи Андреас Любиц жами бир ярим йил психиатр кўмагида даволангани маълум бўлди, дея хабар бермоқда ТАСС Lufthansa компанияси (Germanwings компанияси унинг шуъбаси)га таяниб.
Lufthansa бошқарув раиси Карстен Шпор Любиц бир неча ой давомида ўқишга келмаганини айтди. Bild нашри буни ундаги руҳий муаммоларга йўймоқда. Нашр маълумотларига кўра, Lufthansa’нинг Феникс (АҚШ)даги учувчилар мактабида ўқиш чоғида Андреасда депрессия туфайли муаммолар юзага келган.
Бундан ташқари, Любицнинг фуқаролар авиацияси федерал бошқармасидаги ҳужжатларида унинг «алоҳида ва мунтазам тиббий назорат»га эҳтиёжи борлиги қайд этилган.
Аввалроқ Airbus А320 самолёти иккинчи учувчисига нисбатан «қасддан қотиллик қилиш тўғрисидаги» иш қўзғатилди. Марсель прокурори иккинчи учувчи Андреас Любиц онгли равишда баландликни пасайтирганини айтди. «Унинг буни нима сабабдан қилгани ҳозирча бизга маълум эмас, биз шуни биламизки, самолётни у қулатган», — дея таъкидлади Робен.
Эслатиб ўтамиз, 24 март куни Барселонадан Дюссельдорфга парвоз қилаётган Airbus А320 самолёти Франция жанубида, Альп тоғлари устида ҳалокатга учраши оқибатида лайнер бортида бўлган 150 кишининг барчаси ҳалок бўлган эди.
Изоҳ (0)