Germanwings компаниясининг Airbus А320 самолёти иккинчи учувчисига нисбатан «қасддан қотиллик қилиш тўғрисидаги» иш қўзғатилди. У, тергов маълумотларига кўра, авиалайнерни атайлаб ерга қулатган. Бу ҳақда Марсель прокурори Брис Робен 26 март, пайшанба кунги матбуот анжуманида айтиб ўтди, деб ёзади «Корреспондент.net».
«150 киши учун жавобгар бўлган бир пайтда буни ўз жонига қасд қилиш деб атаб бўлмайди», — деди Робен.
Прокурор иккинчи учувҳи Андреас Любиц онгли равишда баландликни пасайтирганини айтди. «Унинг буни нима сабабдан қилгани ҳозирча бизга маълум эмас, биз шуни биламизки, самолётни у қулатган», — дея таъкидлади Робен.
Марсель прокурори сўзларига кўра, иккинчи учувчи — Германиянинг 28 ёшли фуқароси, бироқ унинг этник келиб чиқиши ва диний мансублиги номаълум. Шунингдек унинг террорчилар билан алоқадорлиги бўлмаган.
«Буни теракт деб аташ учун ҳеч қандай асос йўқ. Энди биз бу одамнинг атрофидаги кишиларни ўрганамиз», — деди прокурор.
Унинг қўшимча қилишича, ўлим жуда тез содир бўлган. Самолёт тоғга соатига 700 км тезликда келиб урилган.
Аввалроқ Airbus А320 самолётининг иккинчи учувчиси атайлаб ҳаво кемаси командирига кабина эшигини очмагани маълум бўлган эди. «Қора қути»дан олинган ёзувда учувчи қайтадан кабинага кирмоқчи бўлгани, бироқ буни уддалай олмаганини эшитиш мумкин. Учувчи дастлаб эшикни секин тақиллатган, сўнг қаттиқроқ урган, шундан кейин эса эшикни уриб синдирмоқчи бўлган, бироқ уддалай олмаган. Охир-оқибат у кабинага кира олмаган.
Эслатиб ўтамиз, 24 март куни Барселонадан Дюссельдорфга парвоз қилаётган Airbus А320 самолёти Франция жанубида, Альп тоғлари устида ҳалокатга учраши оқибатида лайнер бортида бўлган 150 кишининг барчаси ҳалок бўлган эди.
Изоҳ (0)