Бир аёл укасини Тошкент Давлат юридик университетида таълим олишини орзу қилиши ҳақида бозорда танишган бир аёлга гап очди. У эса қўшниси абитуриентларни ўқишга киритиш билан шуғулланишини маълум қилди, деб хабар беради «Ҳуқуқ» газетаси.
Шундан сўнг, улар «Ганга» дўконининг ёнида «ҳожатбарор» қўшни билан учрашди. У киши аёлга укасини истаган таълим муассасаси – «юридикка, молияга ёки миллийнинг ҳуқуқшунослик факультетига киритиб қўя олишини, фарқи фақат нархда эканлигини» айтди. Аёл ушбу баландпарвоз сўзлардан бироз чўчиди, бироқ сир бой бермай, юридик университет ҳам бўлаверишини айтди.
«Ҳожатбарор» шахсдан бунинг учун 40 минг доллар кераклигини эшитган аёл ўйлаб кўришини айтиб, хайрлашди. Эртаси куни товламачи аёлга қўнгироқ қилиб, домла билан гаплашиб қўйгани, энди ортга йўл йўқлигини айтиб, таҳдид билан укасининг паспорти, сурати ва келишилган пулни олиб келишини талаб қилди. Аёл тезда тегишли органларга мурожаат қилди.
Орадан кўп ўтмай, «ҳожатбарор» «мижоз» билан учрашди. У пулларни олган вақтида ашёвий далил билан қўлга олинди. Олиб борилган ҳаракатлар натижасида фирибгар асли Сурхондарёдан эканлиги, муқаддам икки бор судланганлиги, айни пайтда унга нисбатан қўзғатилган жиноят иши судда кўрилаётгани аниқланди.
Суд томонидан товламачига 10 йил-у 6 ой муддатга озодликдан маҳрум этиш жазоси тайинланди.
Изоҳ (0)