Ўзбекистон Республикаси Вазирлар Маҳкамаси Тошкент шаҳрининг эски шаҳар қисмида мавзелар бўйича замонавий кўп қаватли уйлар қуриш (I босқич) тўғрисида қарор чиқарди.
Ушбу қарор Ўзбекистон Республикаси Президентининг «2015 йилда Тошкент шаҳрининг эски шаҳар қисмида замонавий қулай турар-жой яратиш чора-тадбирлари тўғрисида»ги 2014 йил 20 ноябрдаги ПҚ-2265-сонли қарорининг ижросини таъминлаш, шунингдек, Тошкент шаҳрининг бош режасини амалга ошириш, унинг эски шаҳар қисмида замонавий шаҳарсозлик талаблари асосида қулай уй-жойлар қуриш ҳамда ҳудуднинг меъморий қиёфасини ва ижтимоий-маданий ҳолатини тубдан яхшилаш ва аҳоли яшаши учун қулай шарт-шароитлар яратиш мақсадида қабул қилинди.
Қарорга мувофиқ, Тошкент шаҳар ҳокимлигининг:
шаҳарнинг эски шаҳар қисмидаги Нурафшон кўчасида 5 та беш қаватли экспериментал уй қурилиши «Ипотека банк» АТИБ ва «Ўзсаноатқурилишбанк» ОАТБ томонидан ажратиладиган кредитлар ҳисобига молиялаштирилиши;
объектни молиялаштириш учун ажратиладиган кредит маблағларига белгиланган тартибда гаров сифатида давлатга тегишли кўчмас мулк объектларини қўйиш тўғрисидаги таклифлари маъқулланди.
«Ипотека банк» АТИБ ва «Ўзсаноатқурилишбанк» ОАТБ томонларидан бош пудрат ташкилотлари — «Тошкент уй-жой қурилиш» ДУК, «Yevrostroy Plus» ва «Dizayn-Taraqqiyot» ХКга объект қурилиши учун Ўзбекистон Республикаси Марказий банкининг қайта молиялаштириш ставкасидан ортиқ бўлмаган миқдорда объект қийматининг 90 фоизигача кредит маблағлари ажратиш тавсия этилди.
Бунда, тақдим этилаётган кредитлар мазкур объектларни барпо этиш муддатига ажратилиб ҳамда Тошкент шаҳар ҳокимлиги томонидан янги қуриладиган турар-жой хонадонларига кўчиб кирадиган оилаларни аниқ шаклланган рўйхатини, шунингдек барча зарурий ҳужжатларни банкларга киритилгандан сўнг, узоқ муддатли ипотека кредитларига қайта расмийлаштириши инобатга олинади.
Изоҳ (0)