Чеченистон раҳбари Рамзан Қодиров Россия президенти Владимир Путиннинг соғлиғи ҳақидаги миш-мишларни изоҳлади, деб ёзади «РБК» Қодировнинг Instagram’ига таяниб.
«Эҳтимол, бундай қисқа вақт ичида ҳеч қачон ва ҳеч қаерда фуқаролар қулоғига бунча кўп ғийбат, сохта маълумотлар ва сурбетларча ёлғон хабарлар етиб бормаган бўлса керак», — деб ёзди у.
Қодиров таъкидлашича, 16 март куни Путин Петербургда кўриниш бергач, барча «келажакни кўра биладиган» тиллар узилиб тушган.
16 март, душанба куни Путин 5 мартдан буён биринчи марта омма олдида намоён бўлди. Бу Санкт-Петербургда Қирғизистон президенти Алмазбек Атамбаев билан учрашувда содир бўлди. Президент акс этган кадрларни «Россия-1» телеканали эфирга узатди.
Эслатиб ўтамиз, аввалроқ Владимир Путин 6 мартдан буён омма олдига чиқмагани, сўнгги бор президент 5 март куни — Италия бош вазири Маттео Ренци билан учрашувда журналистлар қаршисида намоён бўлгани хабар берилган эди.
11 март куни Reuters Қозоғистон ҳукуматидаги манбасига таяниб, Остонадаги учрашув бўлмаслигини хабар қилган эди. «Ташриф бекор қилинди, Путин касал бўлиб қолганга ўхшайди», — деган эди агентлик ўз манбасига таяниб.
Изоҳ (0)