Facebook’даги «Potrebitel.uz» гуруҳи аъзоларидан бири Тошкент шаҳрида ҳаракатланувчи автобус ҳайдовчиларидан бири унга ўта қўпол муносабатда бўлганини маълум қилди.
Хабар муаллифининг сўзларига кўра, у 2015 йил 2 март куни ўзига керакли жойгача 11-йўналишдаги автобусда етиб олишга қарор қилган. Нукус кўчасидаги бекатда давлат рақами 01 694 LAA бўлган, «3-автобус саройи» акциядорлик жамиятининг 111-гараж рақамига эга 11-йўналишдаги автобусга ўтирган.
Унинг сўзларига кўра, автобус доим катта тезликда ҳаракатланиб, йўл қаторларини алмаштириб турган. Ҳайдовчи кескин тўхтаб ва кескин тезлик олиб турган, бу эса йўловчиларнинг тушиб-чиқишига қийинчилик туғдирган. Чипта сотиш билан шуғулланган 20 ёшлар атрофидаги йигитда на махсус кийим, на чиптачи гувоҳномаси бўлмаган. Ҳайдовчи ёнида турган қиз у билан гаплашиб, йўлдан чалғитиб турган.
Автобус «Истиқлол» санъат саройи яқинидаги керакли бекатга яқинлашгач, йўловчи автобуснинг ўрта эшиги олдига борган. Чиптачи сифатида ишлаётган йигит баланд овозда бутун салондан тушадиганлар бор-йўқлигини сўраган. Бунга жавобан бир қиз тушишини айтган. Ҳайдовчи тезликни пасайтирмагач, жабрланувчи ҳам буни баланд овозда қайтарган. Автобус тўхтамаган, у бу гапни яна икки марта қайтарса ҳам, ҳайдовчи парво қилмаган.
Шундан кейин у ҳайдовчининг олдига бориб нима учун тўхтатмаганини сўраган. Бунга жавобан ҳайдовчи қўпол тарзда шошилаётганини, раҳбарият олдида жавоб бериши кераклигини айтган. Жабрланувчи арз қилишини айтганда ҳайдовчи янада қўполлашиб, бўралаб сўкина бошлаган. Шундан кейин у ҳайдовчини суратга олишини айтган, телефонини олиб уни суратга туширган. Унинг ёнига икки йигит − псевдочиптачи ва унинг ёрдамчиси келиб, халал беришга уринган.
Ҳайдовчининг қўполлиги ва сўкиниши ошиб бораверган. У йўловчининг оила аъзоларини ҳам сўкишга киришганда, ўзини тутиб туролмай ҳайдовчининг юзига зарба беришга уринган, бироқ иккала йигит бунга имкон бермаган. Ҳайдовчи ўриндиғидан туриб, уни ўлдиришини айтган. Бу пайтда автобус «Бунёдкор» метро бекати олдида тўхтаган, йўловчи автобусдан тушиб унинг рақамларини суратга олган. Ҳайдовчи ва шериклари эса унга таҳдид қилишда давом этган.
Жабрланувчи аҳолига хизмат кўрсатишнинг ушбу соҳаси сифати бунчалик тушиб кетганидан, ҳайдовчилар қўполлик қилиб, ўзини шахсий автобусини бошқараётгандек тутишидан, чипта сотувчилардан, керакли бекатларда тўхтатмай, буни раҳбариятга тўнкашларидан, бу соҳада руҳий ҳолати яхши бўлмаган одамлар ишлашидан, ҳайдовчи шаҳар марказида у билан уришиб, ўлдиришга тайёр бўлганидан нолиган. «Тошшаҳартрансхизмат»га ҳам ишонч телефони, ҳам сайти орқали шикоят қилганини маълум қилган йўловчи бу масала ечилишига амин эмаслигини, бундай ҳолатлар Тошкент автобусларида кўп учрашини айтган ва ҳайдовчиларга таъсир қилишнинг бошқа йўлларини сўраган.
Автобус ҳайдовчисини ўта кескин танқид остига олган гуруҳ фойдаланувчилари транспорт прокуратурасига, шунингдек Ягона давлат хизматлари интерактив портали орқали шикоят қилиш самаралироқ бўлишини маслаҳат берган. Бундан ташқари, автобусдаги бошқа йўловчиларнинг телефон рақамларини олиш лозим бўлганини айтишган. Фойдаланувчиларнинг баъзилари раҳбарият ҳайдовчига фақат ҳайфсан берилишини айтган, бошқалар эса қаттиқроқ жазо, жумладан ишдан бўшатиш ва жарима ундирилишига умид билдирган. Шунингдек, нафақат ҳайдовчини балки автокорхона раҳбариятини ҳам жазолаш лозимлиги айтилган. Жабрланувчи Ягона давлат хизматлари интерактив портали орқали шикоят қилганини ва жавобни ҳам маълум қилишини айтган.
Ушбу ҳолат юзасидан «Тосшаҳартрансхизмат» расмий маълумот бермаган.