Президент Ислом Каримовнинг 2014 йил 31 октябрдаги «Ўзбекистон халқ шоири Зулфия таваллудининг 100 йиллигини нишонлаш тўғрисида»ги қарорига мувофиқ шоиранинг қутлуғ юбилейига Ўзбекистон маънавий ҳаётидаги унутилмас воқеа сифатида қизғин ҳозирлик кўрилмоқда, деб хабар бермоқда Ўзбекистон Миллий ахборот агентлиги.
Ёшлар ижод саройида мазкур сана муносабати билан Ўзбекистон Хотин-қизлар қўмитаси ҳамда Ахборот технологиялари ва коммуникацияларини ривожлантириш вазирлиги ҳамкорлигида Зулфия ҳаёти ва ижодига бағишлаб яратилган янги веб-сайтнинг тақдимоти бўлиб ўтди. Янги ташкил этилган «Zulfiyaxonim.uz» веб-сайти шоиранинг ҳаёти, ижоди, фаолияти ҳақида ҳикоя қилади.
Ахборот технологиялари жадал тараққий этган бугунги кунда мазкур сайт ўқувчиларга ижодкорнинг шеърлари, достон ва балладаларидан кенг фойдаланиш имконини беради. Сайтнинг ўзбек, рус, инглиз тилларида яратилишида Зулфия номидаги Давлат мукофоти совриндорларининг салоҳиятидан самарали фойдаланилди.
Сайт 10 бўлим, 20 рукндан иборат бўлиб, унга мингга яқин маълумот, шоира шеърларининг матнлари, аудио ва видео материаллар, 100 дан ортиқ фотосурат жойлаштирилган. Зулфияхонимга замондош бўлган ижодкорларнинг шоира ҳақидаги мулоҳазалари, шогирдларининг ёрқин хотиралари, тасвирий, мусиқа санъати намуналарига кенг ўрин берилган.
Тадбирда веб-сайт имкониятлари хусусида маълумот берилди. Зулфия номидаги Давлат мукофоти совриндорлари иштирокида адабий-мусиқий дастур намойиш этилди.
Анжуманда Ўзбекистон Республикаси Бош вазирининг ўринбосари, Республика Хотин-қизлар қўмитаси раиси Э.Боситхонова сўзга чиқди.
Изоҳ (0)