Prezident Islom Karimovning 2014-yil 31-oktabrdagi “O‘zbekiston xalq shoiri Zulfiya tavalludining 100-yilligini nishonlash to‘g‘risida”gi qaroriga muvofiq shoiraning qutlug‘ yubileyiga O‘zbekiston ma’naviy hayotidagi unutilmas voqea sifatida qizg‘in hozirlik ko‘rilmoqda, deb xabar bermoqda O‘zbekiston Milliy axborot agentligi.
Yoshlar ijod saroyida mazkur sana munosabati bilan O‘zbekiston Xotin-qizlar qo‘mitasi hamda Axborot texnologiyalari va kommunikatsiyalarini rivojlantirish vazirligi hamkorligida Zulfiya hayoti va ijodiga bag‘ishlab yaratilgan yangi veb-saytning taqdimoti bo‘lib o‘tdi. Yangi tashkil etilgan “Zulfiyaxonim.uz” veb-sayti shoiraning hayoti, ijodi, faoliyati haqida hikoya qiladi.
Axborot texnologiyalari jadal taraqqiy etgan bugungi kunda mazkur sayt o‘quvchilarga ijodkorning she’rlari, doston va balladalaridan keng foydalanish imkonini beradi. Saytning o‘zbek, rus, ingliz tillarida yaratilishida Zulfiya nomidagi Davlat mukofoti sovrindorlarining salohiyatidan samarali foydalanildi.
Sayt 10 bo‘lim, 20 rukndan iborat bo‘lib, unga mingga yaqin ma’lumot, shoira she’rlarining matnlari, audio va video materiallar, 100 dan ortiq fotosurat joylashtirilgan. Zulfiyaxonimga zamondosh bo‘lgan ijodkorlarning shoira haqidagi mulohazalari, shogirdlarining yorqin xotiralari, tasviriy, musiqa san’ati namunalariga keng o‘rin berilgan.
Tadbirda veb-sayt imkoniyatlari xususida ma’lumot berildi. Zulfiya nomidagi Davlat mukofoti sovrindorlari ishtirokida adabiy-musiqiy dastur namoyish etildi.
Anjumanda O‘zbekiston Respublikasi Bosh vazirining o‘rinbosari, Respublika Xotin-qizlar qo‘mitasi raisi E.Bositxonova so‘zga chiqdi.
Izoh (0)