iPhone 6 Plus’даги бир қўлда бошқариш режими Android’га мослаштирилди

Мустақил ишлаб чиқувчилар жамоаси iPhone 6 Plus’даги бир қўл билан бошқариш режимини Android платформасига кўчирди, дея хабар бермоқда «Российская газета». Гап Xposed лойиҳаси — Google операцион тизимларида ишловчи қурилмалар функцияларини модификациялаш имконини берувчи дастурлар жамланмаси ҳақида бормоқда.

iPhone 6 Plus’да махсус режим бўиб, Home тугмаси кетма-кет икки марта босилгач, экраннинг тепа қисми пастга тушади, ва кўплаб иконкаларга ҳам бош бармоқни осонгина етказиш мумкин бўлади.

Бундай функция Android-қурилмаларда ҳам пайдо бўлган, бироқ фойдаланувчилар уни жуда ноқулай деб баҳолаган эди. Мустақил ишлаб чиқувчилар эса буни Android’га мослаштирди. Ушбу имкониятдан фақатгина «суперфойдаланувчи» — Root ҳуқуқига эга бўлганлар фойдаланиши мумкин.

Зарур дастурни ўрнатиш уч босқичда амалга оширилади:

Xposed Framework’ни Root-ҳуқуқга эга қурилмага юклаб олиш, сўнг Google Play’дан One Hand Mode дастурини ўрнатиш, уни ишга тушириш ва қурилмани ўчириб ёқиш лозим.

One Hand Mode созламаларига кириб, устки майдон чегарасини кўрсатиш керак, интерфейс ўшандан пастга тушади.

One Hand Mode режимини Tasker’дан фойдаланган ҳолда ишга тушириш керак.