Россия ҳарбий доираларида Кипр президенти Никос Анастасиадиснинг мамлакат ҳудудида Москванинг ҳарбий ҳаво ва денгиз базаларини жойлаштиришга тайёрлиги ҳақидаги баёноти яхши кутиб олинмади, деб хабар бермоқда «Интерфакс».
Ғарб ОАВ маълумотларига кўра, икки мамлакат ўзаро ҳарбий ҳамкорлик тўғрисидаги расмий шартномани 25 февраль куни имзолаши мумкин. ОАВ тахминларига кўра, Россия ҳарбий ҳаво кучлари орол жануби-ғарбида, Буюк Британиянинг «Акротири» ҳарбий ҳаво базасидан 50 километр узоқликда жойлашган Пафос халқаро аэропорти яқинидаги «Андреас Папандреу» авиабазасидан фойдаланиши мумкин.
Шунингдек, Россия ҳарбий денгиз флоти Лимасолдаги базадан доимий равишда фойдаланиши мумкин. Лимасол порти НАТО операцияларига хизмат кўрсатувчи муҳим электрон кузатув терминали ҳисобланган «Акротири» авиабазаси яқинида жойлашган.
Россия Мудофаа вазирлиги Халқаро ҳарбий ҳамкорлик бош бошқармасининг халқаро шартномалар бошқармаси бошлиғи Евгений Бужинскийнинг фикрича, Москвага айниқса ҳозирги иқтисодий шароитларда Кипрда ҳарбий базалар очиш керак эмас. Унинг сўзларига кўра, пулга муҳтож бўлган Кипр ҳозир бунинг учун ҳамма нарсага тайёр. Инглиз ҳарбий базаси яқинидаги базани бериш таклифи унга айниқса ёқмаган. Бужинскийнинг таъкидлашича, Кипр Европа Иттифоқи аъзоси сифатида америкаликлар ва европаликларнинг, биринчи навбатда Буюк Британиянинг таъсир доирасида туради.
Изоҳ (0)