29—30 январь кунлари бўлиб этган «Йил қўшиғи — 2014» мукофоти гала-концерти ўзбек санъати вакиллари учун унутилмас лаҳзалар тақдим этди, деб хабар беради «Popcorn.uz».
Концертнинг иккинчи куни биринчи куни сингари Умидахон ижросидаги «Алла» қўшиғи билан бошланди.
Сўнгра ретро қўшиқлар кетма-кетлиги уланди. Саҳнада Алишер Рўзметов, Отабек Муталхўжаев ҳамда Ёдгор Мирзажонов «Дилбарим» таронасини биргаликда ижро этди.
«Мафтунингман» кинофильмидан Ойбек ва Нигора ҳамда ёш истеъдодли хонанда Музаффар Мирзараҳимов иштирокида саҳна кўриниши намойиш этилиб, барчани кўнглидан ўрин эгаллаган «Мафтун бўлдим» , «Маҳаллада дув-дув гап» фильмида янграган қўшиқларни ижро этилди.
Ниҳоят, концертнинг асосий қисми бошланиб, 2014 йилнинг энг сара ва хит тароналари эгалари саҳнага бирин-кетин чорланди.
Тадбирда Отабек Муҳаммадзохиднинг «Телба денглар» қўшиғи (матн ва мусиқа муаллифи хонанданинг ўзи) йилнинг энг сара қўшиқлари қаторидан жой олди. Мукофотни Ўзбекистон халқ артисти Зулайҳо Бойхонова топширди ва «ЭлДиДо» гуруҳи билан бирга «Ҳай-ҳай» таронасини куйлади.
Алишер Файзнинг бастакор Фазлиддин Раҳмонов ва шоир Насрулло Садрий қаламига мансуб «Ёлғон экан-ку» таронаси ҳам йил қўшиғи деб топилди. Мукофотни таниқли шоир Бобур Бобомурод топширди.
Навбатдаги мукофот Зиёданинг Баҳодир Низамов сўзи, Умид Обидов мусиқаси билан дунёга келган «Севади ёрим мани» таронасига насиб этди. Зиёдани саҳнада Алишер Файз тақдирлади.
Шоҳрухҳоннинг ўз сўзлари билан яратилган «Менинг қўшиғим» таронаси мусиқасини Жасур Бадалбоев басталаган. Мукофотни Райҳон топшириб, муборакбод этди.
Райҳоннинг «Излама» таронаси (шоира Зуҳра, бастакор Убайдулла Каримов) энг сара қўшиқлардан деб эълон қилингач, мукофотни топшириш учун саҳнага таниқли композитор Шуҳрат Зокиров чиқди.
Навбатдаги мукофот Дилфуза Раҳимовага «Лелей» таронаси (шоир Суҳроб Раҳимов, бастакор Азиз Авезов) учун Маҳмуд Номозов томонидан топширилди.
Баҳром Назаровнинг «Айрилдим» таронаси (шоир Ҳушнуд Дарвеш, бастакор хонанданинг ўзи) ни тақдирлаш учун саҳнага чиққан Ўзбекистон ҳамда Қорақалпоғистон халқ артисти Озодбек Назарбеков «Лола» қўшиғини ижро этиб, томошабинларни хушнуд этди.
«Уммон» гуруҳининг «Эслаб қол» (матн ва мусиқа муаллифи гуруҳ аъзоси Зоҳид Рисқиев) таронаси учун мукофот «Шарқ» вокал чолғу ансамбли томонидан тақдим этилди.
«Палов» қўшиғи ва кичик саҳна кўриниши намойиш этилди.
«Йил қўшиғи» мукофотига лойиқ топилган Шаҳзоданинг «Қайнона» қўшиғи (шеърини Комил Фозилов, мусиқасини Калин Марару яратган) учун «Келинлар қўзғалони» кинофильмидан саҳна кўриниши намойиш этилди. Тақдирлаш учун Жаҳонгир Позилжонов чиқди.
Жаҳонгир Позилжоновнинг ўзи эса «Тўйлар муборак» таронаси (Ботир Алиев сўзи, Элдор Қаюмов мусиқаси) учун Ўзбекистон халқ артисти Гулсанам Мамазоитова томонидан мукофотланди.
Барча ғолиб тароналар учун «Йил қўшиғи — 2014» статуэткалари топширилгач, тақдирланган санъаткорлар саҳнага жам бўлиб «Йил қўшиғи» мадҳиясини куйлади.
Маълумот ўрнида, «Йил қўшиғи — 2014» тақдирлаш маросими бу йил илк бора ўтказилди. Бу эса ҳали келаси йиллар давомида бундан-да ажойиб концерт дастурлари намойиши давом этиши ва йилдан йилга хит тароналар сараланишининг илк дебочасидир.
Изоҳ (0)