Ўзбекистонлик кинорежиссёр «Париж, сени севаман!»га монанд фильм суратга олади

Жорий йилнинг баҳорида ўзбекистонлик кинорежиссёр Андрей Африн «Тошкент, сени севаман!» фильмини сурат олишга киришади, дея хабар бермоқда «Podrobno.uz».

Афринга фильм учун сценарийни «Ўзбекфильм»нинг ёш режиссёрлари таклиф қилди. «Тошкент, сени севаман!» турли режиссёрлар томонидан яратилган ва бир-бири билан боғлиқ бўлмаган уч дақиқалик ўн бешта киноновелладан иборат бўлади. Ўз шаклига кўра, лойиҳа Франциянинг «Париж, сени севаман!», Американинг «Нью-Йорк, сени севаман!», Россиянинг «Москва, сени севаман!» фильмларини такрорлайди.

Эслатиб ўтамиз, «Кинопром» компанияси «Тошкент, сени севаман!» кинотўплами учун сценарийлар танловини ўтган йилнинг августида эълон қилган эди.

Лойиҳа ташаббускори «Кинопром» компаниясидир. Фильм тайёр бўлгач, дунёнинг 200 та кинофестивалига тўлиқ шаклда ёки қисман юборилади. Бундан ташқари, кинотеатрларда намойиш этилади, шунингдек интернетдаги оммабоп кинопорталларга жойлаштирилади.

Сценарийлар хиёнат, худбинлик, кўр севги, рашк, эҳтирос ва бевафолик каби мавзуларга асосланган.