Фаластинликлар томонидан БМТ Хавфсизлик Кенгашига кўриб чиқиш учун тақдим этилган резолюция лойиҳаси «навбатдаги тажовузкорлик ҳаракатидир». Бундай баёнот билан Исроил ташқи ишлар вазири Авигдор Либерман чиқиш қилди, деб ёзади ТАСС.
Унинг айтишича, Фаластин президенти Маҳмуд Аббоснинг бундай хатти-ҳаракатдан кўзлаган ягона мақсади Исроилга зарар етказишдир, фаластинликларга эса бу резолюциядан ҳеч қандай фойда бўлмайди.
«У вазиятни тартибга солиш учун ҳеч қандай ёрдам бермайди, чунки Исроилнинг розилигисиз ҳеч қандай ўзгаришлар содир бўлмайди», — дея таъкидлади Либерман.
17 декабрь, чоршанба куни мустақил Фаластин давлатини тузиш лойиҳаси БМТ Хавфсизлик Кенгашига кўриб чиқиш учун киритилган эди. Резолюция лойиҳасидаги Фаластин давлатини яратиш билан боғлиқ барча масалаларни ҳал қилиш учун 12 ой ажратилган. Ҳужжатга мувофиқ, Исроил қўшинлари Фаластин ҳудудидан 2017 йил охиригача чиқариб кетилиши керак.
Изоҳ (0)