Байрам дастурхонига юнонча салат тайёрлаймиз

«Дарё» нашрининг Korzinka.uz супермаркетлар тармоғи билан ҳамкорликдаги Янги йилга бағишланган лойиҳаси доирасида байрам дастурхонига тортиш мумкин бўлган таомлар рецептини тақдим этиб боришда давом этамиз.

Бугунги таомномада — юнонча салат

Ушбу салатни тайёрлаш учун тахминан 20 дақиқа вақт ва 18 800 сўм талаб этилади.

Зарур масаллиқлар:

• 200 г булғор қалампири
• 200 г помидор
• 100 г қизил пиёз
• 200 г бодринг
• 120 г фетакса пишлоғи
• 50 г маринадланган зайтун меваси
• 1 боғ салат барги
• 1—2 бўлак саримсоқ пиёз (тахминан 10 г)
• 50 г зайтун ёғи
• туз
• мурч
• лимон шарбати

Тайёрланиши:

1. 200 граммдан булғор қалампири, помидор ва бодрингни йирик кубик шаклида тўғраймиз.

2. 100 г пиёзни ҳалқа қилиб тўграб оламиз.

3. Сўнг 120 г фетакса пишлоғини йирик кубик кўринишида тўғраймиз.

4. 50 г зайтун меваларини кўндалангига иккига бўлиб чиқамиз. Салат баргини йирик бўлакларга бўламиз.

5. Тўғралган маҳсулотларни катта идишга соламиз.

6. Устидан 50 г зайтун ёғини қуямиз. Сўнг майда тўғралган 1—2 бўлак саримсоқ пиёз, таъбга кўра туз, мурч ва лимон шарбати қўшамиз.

7. Масаллиқларни аралаштириб, тайёр салатни ликопчага соламиз ва ўз фантазиямизга кўра безатамиз.

Салатимиз тайёр. Ёқимли иштаҳа!

Ушбу салатни тайёрлашда фойдаланилган маҳсулотларни Korzinka.uz супермаркетларидан харид қилишингиз мумкин.

Уларнинг нархлари билан қуйидаги жадвалда танишишингиз мумкин. Нархлар 8 декабрь ҳолатига келтирилган.

Рукн ҳомийси — Korzinka.uz супермаркетлар тармоғи.

Таомни тайёрлашда берган кўмаги учун Тошкентдаги Oshxona.uz ресторани ва шахсан бош ошпаз Баҳриддин Чустийга миннатдорчилик билдирамиз.

Рукнимизнинг кейинги сонларида «Тошкент» салати, чизкейк ва олмали штрудель тайёрлаймиз ҳамда улар билан Янги йил дастурхонини безатамиз.