ЮНИСЕФ 2014 йилни болалар учун вайронкор йил деб атади

ЮНИСЕФ ташкилоти 2014 йилни болалар учун даҳшат, қўрқув ва ноумидлик йили бўлганини маълум қилди, деб хабар бермоқда UzDaily.

Қайд этилишича, дунёдаги можароларнинг ёмонлашуви болаларнинг аҳволини янада оғирлаштирган. ЮНИСЕФ ижрочи директори Энтони Лейкнинг сўзларига кўра, бу болалар учун вайронкор йил бўлди: болалар мактабда ўқиётганда ва тўшакда ухлаётганда ўлдириб кетилди, улар етимларга айланди, ўғирлаб кетилди.

Ҳисоб-китобларга кўра, ҳозирда 230 миллион бола қуролли можаролардан азият чекаётган ҳудудларда яшайди. Марказий Африка Республикаси, Ироқ, Жанубий Судан, Фаластин, Сурия ва Украинадаги можаролар оқибатида кўплаб болалар ўз уйларини ташлаб қочқинга айланди. Шунингдек, Афғонистон, Конго Демократик Республикаси, Нигерия, Покистон, Сомали, Судан ва Яманда давом этаётган можаролар ҳам бу ерлардаги болаларга азият етказмоқда.

Марказий Африка Республикасидаги можародан 2,3 миллиондан ортиқ бола заият чеккан бўлиб, 10 мингга яқин болани жангари гуруҳлар ўзига оғдириб олган, 430 дан ортиқ бола ўлдирилган. Ғазо секторидаги 50 кунлик бомбардимонда 54 минг бола қон қуйилишига муҳтож бўлиб қолган, 538 бола нобуд бўлган, 3370 бола жароҳат олган. 7,3 миллион болага азият етказган Суриядаги можаро натижасида 1,7 миллион бола қочқинга айланган, 105 нафар бола ҳалок бўлиб, 300 га яқини жароҳат олган. Ироқдаги можародан 2,7 миллион бола азият чеккан. Жанубий Суданда беш ёшгача бўлган 235 минг бола тўйиб овқатланмасликдан азият чекмоқда.

Улкан қийинчиликларга қарамай, гуманитар ташкилотлар бундай ҳудудлардаги болаларга ёрдам кўрсатишга ҳаракат қилаётгани эътироф этилган.