Швейцария адлия ва полиция федерал департаменти бошлиғи, Социал-демократик партия вакиласи Симонетта Соммаруга 3 декабрь, чоршанба куни 2015 йил учун мамлакат президенти сифатида сайланди. Бу ҳақда ТАСС хабар берди. Овоз бериш Бернда Федерал мажлис палаталарининг биргаликдаги йиғилишида бўлиб ўтди.
Иқтисодиёт, таълим ва тадқиқот федерал департаменти раҳбари лавозимини эгаллаб турган «РДП. Либераллар» партияси аъзоси Иоганн Шнайдер-Амман эса вице-президент этиб сайланди.
Швейцария президенти ва вице-президенти ҳукумат аъзолари орасидан бир йил муддатга, кейинги муддат учун қайта сайланиш ҳуқуқисиз, ротация тамойили асосида сайланади. Бунгача бир йил давомида вице-президент лавозимини эгаллаб турган вазир президентга айланади.
Швейцарияда президент асосан вакиллик функцияларини бажаради. У на давлат раҳбари, на ҳукумат раҳбари ҳисобланади, шунингдек, бошқа вазирларга ҳам раҳбарлик қилмайди.
Изоҳ (0)