UMS’нинг барча тарифлари ва интернет пакетлари — тўлиқ маълумот

1 декабрдан иш бошлаши кутилаётган Universal Mobile Systems (UMS)  мобил операторининг овозли ёрдамчиси — 130-09-09 рақами орқали тариф режалари, акциялар ва интернет пакетлари ҳақида тўлиқ маълумот бермоқда, деб хабар берди «iLike.uz». Овозли ёрдамчи рақамига фақат шаҳар телефонларидан қўнғироқ қилиш мумкин.

Тарифлар

«Старт» тарифида кунлик абонент тўлови 10 сент бўлиб, Ўзбекистон бўйлаб чиқиш қўнғироқларининг бир дақиқаси ва бир SMS нархи 3 центни ташкил қилади. Тариф ойига 100 Мб текин интернетни ҳам ўз ичига олади.

«Макси» тарифида ойлик абонент тўлови 15 доллар бўлиб, ойига Ўзбекистон бўйлаб 1000 дақиқа сўзлашув ва 600 Мб интернетни ўз ичига олади. Бир SMS нархи – 2 центни, лимитдан ташқари сўзлашувнинг бир дақиқаси 2 центни, 1 Мб интернет эса 10 центни ташкил қилади.

Юқоридаги икки тариф ҳақида аввал батафсил маълумот берган эдик.

«Абсолют» тарифида ойига 150 долларга Ўзбекистон бўйлаб чексиз қўнғироқ, SMS ва интернет тақдим этилади.

Шунингдек, иккита корпоратив тариф ҳам ишга туширилади.

Corp тарифида ойига 25 долларлик тўлов эвазига компания ичида чексиз қўнғироқлар, компания ташқарисида эса 2000 дақиқа, 1000 SMS, шунингдек 800 Мб интернет тақдим этилади.

Corp VIP тарифида эса ойига 45 доллар эвазига компания ичида чексиз ва компания ташқарисида 5000 дақиқа қўнғироқ, 2500 та SMS ҳамда 1200 Мб интернет тақдим этилади.

Интернет-пакетлар

UMS иккита интернет-пакет жорий қилиши ҳам кўзда тутилган: 5 доллар эвазига 300 Мб, 10 доллар эвазига 1000 мегабайтлик пакетларни ёқтириш мумкин.

UMS офислари

Қайд этилишича, UMS офислари соат 9:00 дан 18:00 гача ишлайди. Тошкент шаҳридаги бош офис Амир Темур кўчасида жойлашган собиқ «МТС-Ўзбекистон»нинг бош биносида бўлади. Шунингдек, Лабзак мавзесидаги офис ҳам ишга тушади.