Ўзбекистонда янги очиладиган UMS алоқа оператори декабрдаги фаолиятини қандай тариф режалари билан бошлаши маълум бўлди. Бу ҳақда Facebook’даги «Potrebitel.uz» гуруҳи аъзолари хабар бермоқда.
Гуруҳга жойланган суратларда тариф режаларининг нусхаси акс этган. Бироқ ҳужжатларга имзо ёки муҳр қўйилмаган.
Хабарга кўра, ушбу тариф режалари «Старт» ва «Макси» деб номланади. «Старт» тарифида бир ой учун абонент тўлови 3 доллар (суткасига 0,1 доллар), «Макси»да эса 15 долларни ташкил этади. Уларнинг ҳар иккаласига уланиш учун 1,5 долларлик тўлов ва SIM-картанинг дастлабки балансини тўлдириш учун яна 1,5 доллар тўлов амалга оширилади.
Ҳужжатларда ҳар бир тарифдаги кириш ва чиқиш қўнғироқлари, халқаро қўнғироқлар, SMS-хабарлар ва мобил интернет учун белгиланган нархлар кўрсатиб ўтилган.
«Старт» тариф режасида UMS абонентлари, Ўзбекистондаги бошқа операторлар ва шаҳар телефонларига чиқиш қўнғироқлари, шунингдек Ўзбекистон ичида SMS-хабар жўнатиш 3 цент, «Макси»да эса буларнинг барчаси 2 центдан белгиланган.
«Макси» тариф режасига ҳар ойда бепул 1000 дақиқа ҳамда 600 мегабайт интернет , «Старт»га эса 100 мегабайтлик интернет пакети илова қилинади.
Фойдаланувчиларнинг кўпчилиги илова қилинган ҳужжатлар ҳақиқий эканлигига шубҳа билдирган бўлса-да, хабар қизғин муҳокамага сабаб бўлди. Изоҳ ёзганларнинг деярли барчаси нархлар баландлигига нисбатан норозилик билдирди. Баъзилар интернет тезлиги ва алоқа сифати қай даражада бўлишига қизиқиб, бу борада турли тахминлар билдирди.
UMS тариф режалари ҳақида расмий маълумот берилганича йўқ.
Изоҳ (0)