Россия «Биринчи канали»нинг 14 ноябрь кунги эфирида Малайзия «Боинг»и гўё қирувчи самолёт томонидан уриб туширилгани тасвирланган сунъий йўлдош сурати намойиш этилди. Фотосурат «Однако» таҳлилий дастурида тақдим этилган, деб хабар бермоқда «Кун».
«Биринчи канали»дагиларнинг маълум қилишича, фотосурат Россия муҳандислар иттифоқи томонидан юборилган. Иттифоққа эса бу суратни ўзини авиаэксперт ва MIT битирувчиси сифатида таништирган шахс тақдим этган. Тасдиқлашларича, фотосурат Англия ёки Америка сунъий йўлдоши ёрдамида олинган.
Дастурда ушбу сурат «уникал ва сенсацион» деб аталган.
«Meduza»нинг қайд этишича, ушбу сурат илк бор октябрь ойининг ўрталарида эълон қилинган, баъзи фойдаланувчилар эса унинг 2014 йил июлида пайдо бўлганини ҳам таъкидламоқда.
Бундан ташқари, фотосурат қалбаки бўлиши мумкинлиги ҳам айтилмоқда: суратда Донецк шаҳри юқоридан кўрсатилган, ваҳоланки, Malaysia Airlines’га тегишли «Боинг» Донецк вилоятининг Снежное шаҳри яқинида қулаган эди.
Эслатиб ўтамиз, Malaysia Airlines’нинг Boeing 777 самолёти 2014 йилнинг 17 июль куни Донецк вилоятида қулаган эди. Авиаҳалокат натижасида 298 киши ҳалок бўлган.
Авиаҳалокат қайд этилиши билан Украина ҳукумати бунинг учун жавобгарликни мамлакат шарқидаги россияпараст айирмачиларга, шунингдек, Киевнинг фикрича, бу айирмачиларга қурол етказиб бераётган Россияга юклади. Украина ва уни қўллаб-қувватлаётган Ғарб мамлакатлари талқини бўйича Малайзия лайнери «Бук» зенит-ракета мажмуасидан уриб туширилган.
Ўз навбатида, Россия самолёт қулаган куни Украина кузатув тизимлари фаоллиги қайд этилгани, «Боинг» яқинида эса қирувчи самолёт кўринганини маълум қилди.
«Боинг» ҳалокатини ҳозирги вақтда голландиялик терговчилар ўрганиб чиқмоқда. Сентябрь ойида улар илк ҳисоботни тақдим этган, унда самолёт «кўплаб юқори энергетик объектларнинг ташқи таъсири натижасида юз берган тузилмавий бузилишлар» натижасида ҳавода парчалангани айтилганди.
Айнан қандай объектлар ҳақида гап бораётганига ҳисоботда аниқлик киритилмаган. Ҳалокат учун низолашаётган томонларнинг қайси бири жавобгарлиги ҳам ҳисоботда маълум қилинмаган.
Изоҳ (0)