АҚШ, Нидерландия ва Хитой олимлари сониясига 255 терабитгача бўлган тезликда ахборот узатиш қобилиятига эга бўлган янги тола яратди. Ўз тадқиқотлари натижаларини муаллифлар Nature Photonics журналида эълон қилди.
Янги материалнинг ўтказувчанлик қобилияти энг яхши замонавий кабелларникига (сониясига 7—8 терабит) қараганда 21 марта юқоридир. Олимларнинг тадқиқотлари шуни кўрсатдики, технологиялар ривожланиб боргани сари ахборот узатиш тезлигининг ошишига бўлган талаб ҳам геометрик прогрессияда ошиб бормоқда.
Оддий оптик толанинг ўзаги бутун кабель бўйлаб ўтган пластик ёки шишадан иборатдир. Унинг атрофидаги муҳит ёруғликни ўзидан ташқарига ўтишига йўл қўймайди.
Тадқиқотчилар сўзларига кўра, улар стандарт ёруғлик ўтказувчидаги битта ўзак ўрнига еттитасини ишга туширишга муваффақ бўлган.
Шунингдек, мутахассислар битта толага ҳар бири алоҳида ахборотни ташувчи бир нечта частота каналларини киритган. Бироқ толанинг диаметри деярли ўзгармасдан қолган.
Олимлар ўзларининг ихтиросини кўп полосали йўлга қиёслади, бунда бир ўзакли толани эса бир полосали йўлга тенглаштирди.
Изоҳ (0)