Facebook аноним мулоқот учун мўлжалланган дастурни тақдим этди

Facebook ижтимоий тармоғи аноним тарзда мулоқот қилиш учун мўлжалланган Rooms дастурини тақдим этди. Бу ҳақда ТАСС хабар бермоқда. Унинг фойдаланувчилари таклиф этилган мавзулар бўйича тахаллус остида суҳбатлашиши мумкин, бундан ташқари, улар ижтимоий тармоқда рўйхатга олинган аккаунтга эга бўлиши шарт эмас.

Инглиз тилидан «Хоналар» деб таржима қилинувчи ушбу дастурда исталган киши чат очиб, унда иштирок этиш учун барчага таклифнома жўнатиши мумкин. Rooms’нинг ташқи кўриниши янгиликлар тасмасини эслатади, фойдаланувчилар уни кўздан кечириб, ўзига ёққан «хона»ни танлаши мумкин.

Компания вакили Жош Миллернинг аниқлик киритишича, дастурдан фойдаланиш чоғида исмларни ўзгартириш мумкин. «Хона»ларга шунингдек фотосурат, видеолар жойлаш, фон расмларини танлаш мумкин.

АҚШ ва Буюк Британиядагилар ушбу дастурдан фойдаланиш имкониятини қўлга киритиб бўлди. У ҳозирча фақат iOS платформаси учун чиқарилган.