АҚШлик тадбиркор Филипп Лехтер оила аъзолари билан от-аравада сайр қилаётган вақтда шимининг чўнтагидаги iPhone 6 Plus’ни арава четига уриб олди. Яп-янги смартфон чўнтак ичида эгилиб, ёниб кетди, дея хабар бермоқда Mail.ru.

Фойдаланувчи ушбу ҳодисадан кейин кийимлари ва смартфони, шунингдек танасининг куйган қисмини суратга олиб, ўз блогига жойлади.

Унинг ёзишича, телефон ёнгач жуда қуюқ тутун пайдо бўлган. У зудлик билан смартфонни чўнтагидан чиқарган, атрофидагилардан бири унинг оёғига сув қуйган, яна кимдир воқеани камерага муҳрлаган.

Таъкидлаш жоиз, бу iPhone 6 Plus смартфонининг эгилиб кетиши билан боғлиқ биринчи ҳолат бўлмаса-да, унинг кийим чўнтагида ёниб кетиши борасида илк ҳодисадир.

Эслатиб ўтамиз, аввалроқ Apple компаниясининг янги iPhone 6 Plus смартфони жинси шимларнинг чўнтагида букланиб қолиши ҳақида миш-миш тарқалган эди. Шундан сўнг, ушбу смартфонни қўл билан ҳам осон буклаш мумкинлиги ҳақида видео тақдим этилди ва #BendGate хештеги билан Apple’ни масхара қилиш бошланди. Деярли барча компаниялар ушбу имкониятни қўлдан чиқармади.