Қирғизистон собиқ президентининг ўғли порахўрлик учун бир умрга қамалди

Қирғизистон собиқ президенти Қурманбек Бакиевнинг кенжа ўғли — Максим Бакиев Бишкек суди қарори билан порахўрлик учун бир умрлик қамоқ жазосига маҳкум қилинди. Бу ҳақда суд канцеляриясига таяниб ТАСС хабар бермоқда.

2010 йилда Инвестициялар ва инновацияларни ривожлантириш марказий агентлигини бошқарган Максим Бакиев 2 миллиард сом (тахминан 37 миллион доллар) маблағни Ижтимоий фонддан чиқариб олишда айбдор деб топилган.

Кичик Бакиевнинг бизнес-шериклари Михаил Надель ва Евгений Гуревичларнинг ҳар иккаласи мол-мулки мусодара қилинган ҳолда 25 йилга озодликдан маҳрум этилди. Суд қарори билан маҳкумлар давлатга етказилган 3 миллиард сом (55 миллион доллар) зарарни қоплаши керак бўлади.

Эслатиб ўтамиз, Қирғизистон собиқ президенти Қурманбек Бакиев 2010 йил 7 апрелдаги оммавий қирғинни уюштиришга алоқадор деб топилиб, мол-мулки мусодара қилинган ҳолда умрбод қамоқ жазосига сиртдан ҳукм қилинган эди.

Аввалроқ Қурманбек Бакиев Буюк Британия фуқароси Шон Дейлига суиқасд ташкил қилишда айбланиб 25 йилга озодликдан маҳрум қилинган эди.

Бакиев 2005–2010 йилларда президентлик қилган. 2010 йил апрель воқеаларида қўзғолончилар ва ҳукумат кучлари ўртасидаги тўқнашувларда 80 дан ортиқ киши ҳалок бўлган, яна 300 киши яраланган. Тўнтаришдан кейин президент Александр Лукашенко таклифи билан Белоруссияга кетган. Қирғизистон ҳукумати тепасига келган рақиблари Бакиевни топширишни талаб этишган, аммо Белоруссия уни Қирғизистонга топширишдан бош тортган.