Qirg‘iziston sobiq prezidenti Qurmanbek Bakiyevning kenja o‘g‘li — Maksim Bakiyev Bishkek sudi qarori bilan poraxo‘rlik uchun bir umrlik qamoq jazosiga mahkum qilindi. Bu haqda sud kanselyariyasiga tayanib “TASS” xabar bermoqda.
2010-yilda Investitsiyalar va innovatsiyalarni rivojlantirish markaziy agentligini boshqargan Maksim Bakiyev 2 milliard som (taxminan 37 million dollar) mablag‘ni Ijtimoiy fonddan chiqarib olishda aybdor deb topilgan.
Kichik Bakiyevning biznes-sheriklari Mixail Nadel va Yevgeniy Gurevichlarning har ikkalasi mol-mulki musodara qilingan holda 25 yilga ozodlikdan mahrum etildi. Sud qarori bilan mahkumlar davlatga yetkazilgan 3 milliard som (55 million dollar) zararni qoplashi kerak bo‘ladi.
Eslatib o‘tamiz, Qirg‘iziston sobiq prezidenti Qurmanbek Bakiyev 2010-yil 7-apreldagi ommaviy qirg‘inni uyushtirishga aloqador deb topilib, mol-mulki musodara qilingan holda umrbod qamoq jazosiga sirtdan hukm qilingan edi.
Avvalroq Qurmanbek Bakiyev Buyuk Britaniya fuqarosi Shon Deyliga suiqasd tashkil qilishda ayblanib 25 yilga ozodlikdan mahrum qilingan edi.
Bakiyev 2005–2010-yillarda prezidentlik qilgan. 2010-yil aprel voqealarida qo‘zg‘olonchilar va hukumat kuchlari o‘rtasidagi to‘qnashuvlarda 80 dan ortiq kishi halok bo‘lgan, yana 300 kishi yaralangan. To‘ntarishdan keyin prezident Aleksandr Lukashenko taklifi bilan Belorussiyaga ketgan. Qirg‘iziston hukumati tepasiga kelgan raqiblari Bakiyevni topshirishni talab etishgan, ammo Belorussiya uni Qirg‘izistonga topshirishdan bosh tortgan.
Izoh (0)