Оттавада 22 октябрь, чоршанба куни шаҳар марказида отишмалар уюштирган ёвуз ниятли кишиларни қидириш бўйича махсус операция давом этмоқда, деб ёзади Euronews.
Ҳодисалар Биринчи жаҳон урушида ҳалок бўлган канадаликларга бағишланган меъморий ёдгорлик ёнида ҳамда парламент тепалигида содир бўлган.
Номаълум шахс ёдгорлик яқинида фахрий қоровул аскарларга қарата ўт очганидан сўнг махсус операция бошланиб кетди. Ҳужум натижасида аскарлардан бирини ўлдиргач, жиноятчи парламент биноси мажмуаси ҳудудига кириб олишга муваффақ бўлган.
Махсус операциялар давомида бир нафар гумонланувчи отиб ташланди. Маълумотларга кўра, у Канаданинг ислом динини қабул қилган фуқароси Майкл Зеҳаф-Бибо бўлган.
Айни пайтда махсус операция давом этмоқда.
Эслатиб ўтамиз, ушбу ҳодисадан бир кун аввал Канада ички террорчилик таҳдиди паст даражадан ўрта даражага чиққанини эълон қилган эди. Бу яқинда канадалик ҳарбийларга ҳужум қилингани билан боғлиқдир. 20 октябрь куни Канаданинг Квебек провинциясидаги Сен-Жан-сюр-Ришеле шаҳрида 25 ёшли Мартин Рулё ўз машинаси билан мамлакат қуролли кучларининг икки ҳарбий ходимини уриб кетган ва қочиш жараёнида автомобили ағдарилиб кетган. У полиция билан отишма чоғида ҳалок бўлган. Кейинроқ жабрланган ҳарбийлардан бири шифохонада ҳаётдан кўз юмган.
Изоҳ (0)