2014 йил 18 октябрь куни тонгда Тошкент ҳайвонот боғидаги Путра исмли фил чап томони билан ётган ҳолда топилди. У мустақил тура олмади. Бундан хавотирга тушган урғочи Путри эса филни туртиб, уни устига чиқди. У жон-жаҳди билан Путрага ёрдам беришни истади, бироқ айнан шу ҳаракатлари билан филнинг ўрнидан туришига халал берди, деб хабар бермоқда Тошкент ҳайвонот боғи ахборот хизмати.
Путранинг олдидан урғочи фил — Путрини ҳайдашнинг иложи бўлмади. Путра нафас олишдан тўхтагачгина урғочи фил ўзини ажратиб қўйишларига имкон берди.
Аниқланишича, 13 ёшли ўсмир фил юрак хуружи (миокард инфаркти)дан вафот этган. Филнинг юрак бўшлиғи ва йирик қон томирларида кўплаб ёғ бирикмалари топилган.
Исми таржима қилинганда шаҳзода маъносини берувчи Путра Тошкент ҳайвонот боғига 2004 йил Малайзиянинг Zoo Melaka зоопаркидан келтирилган. Бир неча ойдан сўнг Малайзиядан Путри (малика) исмли урғочи фил ҳам келтирилган.
Маълум қилинишича, филларга қанчалик кўп ғамхорлик қилинмасин, уларнинг, айниқса, Путранинг овқат ҳазм қилиш йўлида вақти-вақти билан турли муаммолар пайдо бўлган. Шу боис саккиз йил аввал малайзиялик мутахассислар ҳам ёрдамга чақирилган.
Путра ва Путри бир-биридан ажратиб бўлмас ажойиб жуфтлик эди, дейилади сайтда.
Изоҳ (0)