Ўта оғир вазн тоифасидаги россиялик боксчи Александр Поветкин Бутунжаҳон бокс ассоциацияси (WBA) рейтингидан четлаштирилди, дея хабар бермоқда Segodnya.ua WBA расмий сайтида эълон қилинган янги рўйхатга таяниб.
Янги рейтингдаги юқори 15 таликка Поветкин киритилмаган, аввал у учинчи ўринда жойлашган эди, деб ёзади нашр.
Поветкин 2011—2013 йилларда WBA «доимий» жаҳон чемпиони унвони соҳиби бўлган. Ўтган йилнинг октябрида у Владимир Кличкога очколар бўйича ютқазиб қўйди. Шу йилнинг баҳорида WBA унга «доимий» чемпионлик унвони учун кубалик Луис Ортис билан жанг қилишни таклиф этди. Поветкин бу таклифни рад этиб, унинг ўрнига май ойида германиялик Мануэль Чарр билан рингга тушди ва 7-раундда ютқазиб қўйди.
Кейинги баҳсни у 24 октябрь куни Москвада камерунлик Карлос Такамга қарши олиб боради.
Айни пайтда ўта оғир вазн бўйича WBA рейтингида Ортис етакчилик қилмоқда. Кейинги жангни у ўзбекистонлик Руслан Чагаевга қарши олиб боради.
Эслатиб ўтамиз, аввалроқ WBA ўзбекистонлик «доимий» жаҳон чемпиони Руслан Чагаев ва кубалик вақтинчалик чемпион Луис Ортис ўртасида ўта оғир вазнда унвон учун кураш бўйича музокараларни бошлаш мажбуриятини юклаган эди. Томонлар берилган 30 кун муддат ичида келишиб олмаса, жангни ўтказиш ҳуқуқи кимошди савдосига қўйилиши маълум қилинган.
Изоҳ (0)