Қирғиз халқининг тарихий қаҳрамонларидан бири – Қурбонжон додхоҳ ҳаётидан ҳикоя қилувчи «Қурбонжон додхоҳ» («Курманжан Датка») фильми АҚШ киноакадемиясининг «Оскар» мукофоти учун курашади, дея хабар бермоқда «Кун» Tengrinews.kz’га таяниб.
Режиссёр Сиддиқ Шерниёз томонидан суратга олинган фильмнинг Қирғизистондаги премьераси 31 августда бўлиб ўтганди. Ҳозирги вақтда фильм «Оскар»нинг «Хорижий тилдаги энг яхши фильм» йўналиши бўйича номзодлар рўйхатига киритилган.
Умуман, ҳозирги вақтда ушбу йўналиш бўйича номзод фильмлар сони 100 тага тенг бўлиб, дастлабки саралашдан сўнг улар сони 50 тага қисқаради. Энг сўнгги босқичда эса «Оскар» ҳайкалчаси учун фақат тўққиз фильм даъвогарлик қилади.
«Кураш анча қизғин бўлади, бироқ биз курашамиз. ‘Қурбонжон додхоҳ’ Қирғизистонда муваффақиятли намойиш этилди. Шу кунларда фильмни Нью-Йоркда намойиш этамиз, янада яқин вақт ичида эса Россия кинопрокатига чиқамиз», – деди Сиддиқ Шерниёз.
Қирғизистонда суратга олинган фильм съёмкаси уч йил давом этган, унда 700 нафар актёр (оммавий саҳналарида эса, The Guardian маълумотига кўра, 10 минг киши) иштирок этган. Фильмни суратга олиш учун Қирғизистон бюджетидан 70 миллион қирғиз сўми (тахминан 1,5 миллион доллар) ажратилган.
Қурбонжон додхоҳ Олой қирғизларининг маликаси ҳисобланади. У, XIX асрда эрининг ўлимидан сўнг, Қўқон хонлиги таркибида қирғиз халқлари иттифоқига раҳбарлик қилиб, рус босқинчиларига қарши курашган.
Изоҳ (0)