НАТО Россия томонидан халқаро меъёрларнинг бузилишига кўниб юрмоқчи эмас, дея таъкидлади Шимолий Атлантика альянсининг янги тайинланган бош котиби Йенс Столтенберг 1 октябрь куни бўлиб ўтган матбуот анжуманида.
«НАТО Россия билан қарама-қаршиликларни хоҳламайди. Бироқ биз Россия томонидан халқаро меёрларнинг бузилишига чидаб турмоқчи эмасмиз. Биз суверен ва мустақил Украинани қўллаб-қувватлашда давом этамиз», — дея Столтенберг баёнотидан иқтибос келтирди «Европейская Правда» нашри.
Янги тайинланган бош котиб НАТОнинг Уэльсдаги саммитида қабул қилинган қарорларни ҳаётга татбиқ этиш вақти келганини таъкидлади. «Альянсни кучайтириш — ишимдаги бош мақсадлардан бири», — деди у.
«Биз Россия билан конструктив алоқалар ўрнатишни истаймиз. Бу эса альянсни мустаҳкамлаш стратегиясига зид эмас. Биз Россиянинг ўз хатти-ҳаракатларини ўзгартириб, халқаро мажбуриятларга яна риоя қила бошлаганини кўришимиз керак», — дея қайд этди Столтенберг.
НАТО раҳбари альянснинг Украинага тўртта — кибер хавфсизлик, логистика, консультациялар ҳамда ярадор ҳарбийларга ёрдам йўналишларида кўмак беришга тайёрлигини айтди.
1 октябрдан НАТОни Йенс Столтенберг расман бошқармоқда. Бундан аввал ушбу вазифани Андерс Фог Расмуссен бажарган.
Изоҳ (0)