Ғарб санкцияларига жавоб чораларининг иккинчи тўплами тайёр, бироқ Россия соғлом фикр баланд келиб, уларга зарурият туғилмаслигига умид қилмоқда. Бу ҳақда Россия президенти ёрдамчиси Андрей Белоусовга таяниб, «РИА Новости» хабар берди. Унинг сўзларига кўра, жавоб чоралари бу сафар автомобиль ва баъзи енгил саноат маҳсулотлари импортига тааллуқли бўлиши мумкин.
«Бизда европалик шерикларимиз асосан биздан оладиган қишлоқ хўжалигига тегишли бўлмаган маҳсулотларнинг қатор рўйхати бор. Булар, масалан, автомобиль, баъзи енгил саноат маҳсулотлари ва кийим-кечакларга тегишлидир», — деди Белоусов.
Шу билан бирга, у Россиянинг санкцияларга жавоби маҳаллий ишлаб чиқарувчилар ва истеъмолчиларга зарар етказмаслиги, аксинча уларни қўллаб-қувватлаши кераклигини айтди.
«Билишимча, ҳозир иқтисодий тараққиёт вазирлиги ушбу рўйхатни тайёрлаб қўйган. Бироқ умид қиламанки, соғлом фикр устун келади ва биз жавоб чораларини қўллашимизга ҳожат қолмайди», — дея қўшимча қилди Путин ёрдамчиси.
Изоҳ (0)