Европа Иттифоқи Россиянинг «Роснефть», «Транснефть» ва «Газпром нефть» ёқилғи-энергетика компанияларини қарз билан молиялаштиришни тақиқлади. Янги санкцияларга учраган компаниялар номлари 12 сентябрь, жума куни Евроиттифоқ Расмий журналида эълон қилинди, деб ёзади ИТАР-ТАСС. Санкциялар эълон қилинганидан бошлаб кучга кирди.
Шунингдек, ЕИ бешта Россия банклари — «Сбербанк», «ВТБ», «Газпромбанк», «ВЭБ» ва «Россельхозбанк» учун заёмлар ва инвестиция хизматларини тақдим этишга чекловлар киритди.
Бундан ташқари, Россиянинг учта энг йирик мудофаа концернлари бўлмиш «Уралвагонзавод», «Оборонпром» ва Бирлашган авиақурилиш корпорацияси учун қарз билан молиялаштиришни ташкил қилиш тақиқланди.
Евроиттифоқ санкция рўйхатига Россиянинг тўққизта мудофаа концернлари киритилди, ушбу компанияларга 12 сентябрдан бошлаб икки вазифали Европа технологияларини етказиб бериш ман қилинди.
Россия ва Украина учун қора рўйхатга яна 24 та исм-шариф қўшилди ва ундаги жами шахслар сони 119 тага етди. ЕИ Расмий журналида берилишича, «Ростех» корпорацияси раҳбари Сергей Чемезов, «Донецк Халқ Республикаси» бош вазири Александр Захарченко, Владимир Жириновский, Госдума спикери ўринбосарлари Васильев, Мельников, Лебедев, Левичев санкцияларга учради.
11 сентябрь, пайшанба куни ЕИнинг 28 давлати 12 сентябрдан Россияга қарши қўшимча санкциялар жорий қилиш ҳақида қарор қабул қилди.
Изоҳ (0)