Россия АҚШ ва яна бошқа еттита давлатни Ядро қуроли синовларини ялпи тақиқлаш тўғрисидаги шартнома (ЯҚСЯТШ)га қўшилишга чақирган кўплаб БМТ давлатларидан бири бўлди. Бу ҳақда ИТАР-ТАСС хабар берди.
Ядро қуроли тарқалмаслиги ва қуролсизлантириш бўйича режимнинг асосий таркибий қисмлари кучга кириши учун уни ядро қуролига ёки уни яратиш имкониятига эга бўлган 44 та давлат имзолаши ва ратификация қилиши лозим. Бугунги кунгача фақат саккиз мамлакат буни амалга оширмаган. Булар АҚШ, Хитой, КХДР, Миср, Ҳиндистон, Эрон, Исроил ва Покистондир.
Ядро синовларига қарши тадбирлар Халқаро куни муносабати билан Бош Ассамблея махсус мажлисида нутқ сўзлар экан, Россия Федерациясининг БМТдаги доимий вакили ўринбосари Александр Панкин шартномага қўшилмаган саккиз давлатнинг ЯҚСЯТШ тақдири учун «алоҳида жавобгарлик»ка эга эканини айтиб ўтди. «Биз бу мамлакатларни дарҳол ва дастлабки шартларсиз уни имзолаш ва ратификация қилишга чақирамиз», — деди дипломат.
БМТ Бош котиби Пан Ги Мун ҳам синовларнинг тақиқланиши ядровий қуролсизланишнинг «марказий компоненти» эканлигини таъкидлади. У шартнома матни Бош Ассамблея томонидан 18 йил аввал тасдиқланганини эслатиб, унинг ҳали ҳам кучга кирмаганига ачиниш билдирди. У ҳам АҚШ ва қолган етти давлатни ЯҚСЯТШга қўшилиш ва барча кучларни бош мақсад — ядро қуролидан холи тинчликка эришишга йўналтиришга даъват этди.
Изоҳ (0)