Ўзбекистон Республикаси Вазирлар Маҳкамасининг 2014 йил 8 сентябрда қабул қилинган «Мамлакатнинг ижтимоий ҳаётида фаол қатнашаётган ёш оилаларни уй-жой билан таъминлашни янада қўллаб-қувватлаш чора-тадбирлари тўғрисида»ги қарорига асосан, «Қорақалпоғистон Республикаси, вилоятлар ва Тошкент шаҳрида кўп квартирали уйлар қуриш ҳамда мавжуд фойдаланилмаётган ва қурилиши тугалланмаган объектларни ёш оилалар учун кўп квартирали (кейинги ўринларда ‘Камолот’ уйлари деб аталади) уйлар этиб реконструкция қилиш» белгилаб қўйилди. Бу ҳақда «Камолот» Ёшлар ижтимоий ҳаракатининг расмий сайтида хабар берилди.
Қарорда белгиланишича, имтиёзли кредитларга бериладиган уйлар фақатгина «Камолот» ЁИҲ Марказий Кенгаши тавсиясига биноан амалга оширилади. Сотиб олинадиган уйлар учун бошланғич бадал тўламаслик ҳам қарорда қайд этилган.
«‘Камолот’ уйларидаги сотиб олинадиган кватиралар қийматини тўлаш учун бошланғич бадал тўламасдан, Ўзбекистон Республикаси Марказий банкининг қайта молиялаштириш ставкасига тенг бўлган фоизли ставка билан 20 йил муддатга, шу жумладан, беш йиллик имтиёзли даврга бериш тўғрисидаги таклифлари маъқуллансин», дейилади қарорда.
Шунингдек, Вазирлар Маҳкамасининг 2007 йил 3 январдаги 2-сон қарори билан тасдиқланган «Уй-жой қурилишига, уни реконструкция қилишга ва сотиб олишга ипотека кредити бериш тўғрисидаги Низом»га ҳам қўшимчалар киритилди.
Изоҳ (0)