Ўзбекистон — Янги Зеландия терма жамоалари ўртасидаги ўртоқлик ўйинидан аввал ташкил этилган матбуот анжуманининг иккинчи қисмида Ўзбекистон терма жамоаси бош мураббийи Миржалол Қосимов ва ярим ҳимоячи Темур Кападзе иштирок этди, деб хабар бермоқда Uff.uz.
Миржалол Қосимов эртанги Янги Зеландия билан бўладиган учрашув ҳақида фикр билдирар экан, рақиб анча интизомли жамоа экани, европача ўйин намойиш қилиши ҳақида айтди. «Ўйлайманки, эртага мухлисларга ёқадиган ўйин бўлади», — деди мураббий.
Темур Кападзе ҳам эртага муҳим ва қизиқарли баҳс кутиб тургани, ўйинга тайёргарлик кўриш вақтида рақиб яхшилаб ўрганиб чиқилгани ва мухлисларга ғалаба тақдим этиш учун Ўзбекистон жамоаси қўлдан келганча ҳаракат қилишини қайд этди.
Суҳбат чоғида Янги Зеландияга қарши ўйин рақиб таклиф этган услубдан келиб чиқиб ташкил этилиши таъкидланди.
Миржалол Қосимов терма жамоанинг ҳужумида муаммолар борлигига қарамай, ярим ҳимоя кучли эканини айтиб, Одил Аҳмедов, Сервер Жепаров, Азиз Ҳайдаров, Темур Кападзе каби кучли футболчилар гол киритишда ҳужумчиларга яқиндан ёрдам беришига ишонч билдирди.
Мураббий рақиб жамоанинг савияси юқори эканлигини қайд этиб, Янги Зеландия таркибидаги бир қатор футболчилар Англия, Германия, Норвегия чемпионатларида тўп суриши, ҳимояда тартибли ҳаракат қилиши, ҳужумга ўтилганда, ярим ҳимоя олдинги чизиқдагиларга катта ёрдам беришини маълум қилди. «Уларнинг Японияга қарши ўртоқлик ўйинини кўриб чиқдик. Айниқса, менга уларнинг 20-рақамда ўйнайдиган футболчиси ёқди. Бўйи баланд бўлишига қарамай, енгил ҳаракат қилар экан. Жуда тезкор футболчи. Шунингдек, янги зеландияликлар стандарт вазиятларда ҳам яхши ҳаракат қилади», — деди Қосимов.
У, шунингдек, Ўзбекистон термасидаги хатоликлар устида, хусусан, бурчак тўплари, стандарт вазиятлар борасида ишланаётганини таъкидлади.
Темур Кападзе жароҳати туфайли танаффус қилишга мажбур бўлгани ҳақида айтар экан, унинг анча фойдали ўтганини қайд этди. «Иштиёққа тўлиб қайтдим. Ҳар қандай футболчи термага чақирилганидан хурсанд бўлади. Мен ҳам яна чақирув олганимдан жуда хурсандман. Бор кучимни сарфлаб терма жамоа ғалабаларига ҳисса қўшишга тайёрман», — деди Кападзе.
Футболчи Ўзбекистонда плей-офф тизимини йўлга қўйиш ғоясини маъқуллаб, бу тизим футболчилар учун жисмоний ҳолатларини бир маромда ушлаб туришга ёрдам беришини таъкидлади. «Шунингдек, клубларда ҳам чемпионлик учун курашишда имконият сўнгги тургача давом этарди. Масалан, бу тизимда икки давра якунига кўра бешинчи ё олтинчи ўринни олган жамоа плей-оффда юқорироқ ўринлар учун, ҳаттоки, чемпионлик учун курашиши мумкин», — деб қайд этди Кападзе.
Миржалол Қосимовнинг «Миллион» гуруҳи концертида анча танқид остига олингани, Иорданияга қарши ўйинда ҳам «Болаларда айб йўқ» деган ёзув туширилган футболкалар стадионда сотилгани билан боғлиқ саволга бош мураббий бу каби ҳолатларга аҳамият бермасликка ҳаракат қилишини айтди: «Битта гап бор: агар сенинг ортингдан гапиришаётган бўлса, демак сен олдиндасан. Бу каби ҳолатлардан юқорироқ туришга интиламан. Эл оғзига элак тутиб бўлмайди.
Яқинда бир тадбирда ўша ‘Миллион’ гуруҳи йигитлари билан учрашиб қолдик. Улар мендан кечирим сўради. Уларни ҳам тушунаман. Тирикчиликнинг айби йўқ. Уларнинг иши шу — одамларни кулдириб, пулини олиш. Биз ҳам ўз ишимизни қиляпмиз. Битта нарсани таъкидлаб ўтмоқчи эдим, ҳеч қачон қилаётган ишимдан уялмайман. Балки қаердадир хатоларга йўл қўяётгандирмиз, балки ҳаммаси биз кутгандек чиқмаётгандир. Лекин ҳамиша ўз ишимга сидқидилдан ёндошиб, ҳалол ишлашга ҳаракат қиламан», — дея Қосимов ўз фикрини якунлади.
Изоҳ (0)