Qozog‘iston hech qachon davlat bo‘lgan emas. Bu haqda Rossiya Federatsiyasi prezidenti Vladimir Putin 29-avgust, juma kuni “Seliger” yoshlar forumida aytib o‘tdi, deb yozadi UNIAN.
U Qozog‘iston prezidenti Nursulton Nazarboyev “g‘aroyib ishni amalga oshirib, shu paytgacha davlat bo‘lmagan hududda davlat tuzgan”ini ta’kidladi. “Shu ma’noda Sobiq ittifoqdan keyingi davlatchilik uchun u noyob kishidir”, — dedi Putin.
Shu bilan birga Rossiya yetakchisi Nazarboyevni “doim o‘z mamlakatining kelajagi haqida qayg‘uradigan juda dono va tajribali rahbar” deb ta’rifladi. “U hech qachon o‘z xalqi xohish-irodasiga qarshi bormaydi. U xalq nima kutayotganligini juda yaxshi his qiladi”, — deya qo‘shimcha qildi Putin.
Ta’kidlash joiz, Vladimir Putin Nazarboyev Ukrainaning Yevroittifoq bilan kelishuvlarini qo‘llab-quvvatlashi fonida bunday bayonotni berdi. 26-avgust kuni Minskda Pyotr Poroshenko bilan uchrashuv chog‘ida Nazarboyev Bojxona ittifoqi bo‘yicha Rossiya sherigiga bu bitim ziyon keltirmasligini aytdi.
Bundan tashqari, Nazarboyev Ukraina bilan samarali hamkorlik qilishga ham va’da berdi.