Samsung ботиқ экранли Gear S ақлли соатини тақдим этди

Samsung компанияси янги, ботиқ дисплейли Gear S номли ақлли соатини тақдим этди. Бу ҳақда The Verge маълумотига асосланиб «Пароль» нашри хабар берди.

Gear S ақлли соати 2 дюймли AMOLED дисплейига эга ва у Android эмас, Tizen операцион тизимида ишлайди. Ушбу ақлли соат нафақат катта дисплейи билан, балки 3G алоқаси сабаб бошқа ақлли соатлардан фарқ қилади.

Унга SIM-карта ўрнатилади ва унда 3G алоқа борлиги учун исталган масофадан ҳам смартфон билан боғлана олади. Bluetooth ёрдамида смартфон билан боғланадиган ақлли соатлар учун эса боғланиш масофаси чегаралангандир.

Gear S ақлли соатида компаниянинг S Health – соғлиқни назорат қилиш дастури ҳамда Nike+ Running, Nokia’нинг Here Maps каби дастурлари ўрнатилган бўлади.

Гаджет чанг ва сувга чидамлилик – IP67 сертификатига эга.

Шунингдек, унда акселерометр, барометр, компас каби ўлчов воситалари ҳам мавжуд бўлади. Батареясининг қуввати эса 300 мА·соатни ташкил этади, бу қувват ақлли соатни икки кун қайта қувватламасдан ишлатишга етади.

Қурилма октябрдан сотувга чиқарилади, бироқ ҳозирча унинг нархи қандай бўлиши ҳақида маълумотлар берилмаган. Samsung Gear S ақлли соатининг суратларини ушбу манба орқали томоша қилишингиз мумкин.

Samsung компаниясининг Ўзбекистонда сотилаётган Gear Fit, Galaxy Gear, Galaxy Gear 2, Galaxy Gear Neo каби ақлли соатларининг нархи билан мана бу мақола орқали танишишингиз мумкин.