Россия фуқароси ўзбекистонликни ов қуроли билан отиб ўлдирганликда гумон қилинмоқда
Россиянинг Калининград вилоятида 35 ёшли фуқаро Ўзбекистон Республикаси фуқаросини отиб ташлади, дея хабар бермоқда Россия Федерацияси Тергов қўмитаси матбуот хизмати.
Ҳодиса юзасидан жиноят белгилари бўйича жиноий иш қўзғатилди. Тергов версиясига кўра, 2014 йил 21 август куни Гурьевск туманидаги Прибрежное қишлоғида бир нафар калининградлик ва беш нафар ўзбекистонлик ўртасида маиший негизда келишмовчилик юзага келади. Гумонланувчи ўз автомобили юкхонасидан ов қуролини олиб, уни иккита патрон билан ўқлайди ва ўз рақиблари оёғини мўлжаллаб ўт очади. Иккинчи ўқ тўғри Ўзбекистон Республикасининг 37 ёшли фуқароси қорнига бориб тегади. Олган жароҳати туфайли жабрланувчи касалхонага бориш йўлида вафот этади.
Ўта оғир жиноятни амалга оширишда гумон қилиниб, 35 ёшли эркак ҳибсга олинди. У бўлган воқеа юзасидан ўз айбини тан олиб кўрсатмалар берди, бироқ ўлимга олиб келган ўқни тасодифан узганини таъкидлади.
Жиноят ишини тергов қилиш ишлари давом этмоқда. Терговчилар юзага келган келишмовчиликнинг ҳақиқий сабаблари ва холис вазиятларини аниқлаши керак бўлади.
