Хитой миллий нефть-газ корпорацияси (China National Petrolium Corp., CNPC) ва «Ўзбекнефтгаз» МХК Ўзбекистон ҳудудида Хитой—Марказий Осиё газ қувурининг D тармоғини қуриш ва ишлатиш учун қўшма корхона ташкил қилади. Бу ҳақда UzDaily хабар берди.
Тармоқ ишга туширилгач, Хитой—Марказий Осиё газ қувури орқали Марказий Осиёдан Хитойга етказиб бериладиган табиий газ ҳажми йилига 85 миллиард кубометрга етади, натижада ушбу газ қувури минтақадаги энг йирик газ ўтказиш тизимига айланади.
CNPC ва «Ўзбекнефтгаз» МХК Муборакдаги газни қайта ишлаш заводи асосида янги кимё-газ заводини қуришни ҳам режалаштирмоқда. Янги завод Марказий Осиё бозорига мўлжалланган полиэтилен ва суюлтирилган газ ишлаб чиқаради.
Қўшма корхона ташкил этиш ҳақида келишув ва Муборакда газ-кимё заводини қуриш ҳақидаги меморандум CNPC бошқаруви раиси Чжоу Цзипин ва «Ўзбекнефтгаз» МХК бошқаруви раиси Шокир Файзуллаев томонидан 19 август, сешанба куни Пекинда Ўзбекистон президенти Ислом Каримовнинг Хитойга ташрифи доирасида имзоланди.
Изоҳ (0)