Украина ташқи ишлар вазирлиги Россия Федерацияси олий раҳбариятининг президент Владимир Путин иштирокида Қримда мажлис ўтказиш режасини номақбул деб топди. Бу ҳақда Украина ташқи ишлар вазири ўринбосари Данила Лубкивский баёнотига таяниб, «Сегодня» нашри хабар берди.
«Қрим ноқонуний равишда босиб олинган. У ерга Россия Федерацияси раҳбариятининг ташриф буюриши номақбулдир», — деди Лубкивский.
Нашрнинг эслатишича, Россия ОАВлари 14 август куни Путин Қримга ташриф буюриб, вазирлар ва Давлат думаси депутатлари олдида нутқ сўзлаши ҳақида хабар берган эди.
Давлат думаси депутатлари маҳаллий аҳоли билан мулоқот қилиш учун 12 августдаёқ Қримга келади, асосий тадбир эса 14 августга режалаштирилган: Путин ва Медведев билан учрашиш учун Давлат думаси Ялтада тўлиқ таркибда йиғилади.
Эслатиб ўтамиз, Қрим март ойида Россия таркибига қўшилган, бироқ на Украина, на БМТ ва на ЕХҲТ ярим оролнинг ажралиб чиқишини тан олмоқда. Олий Рада раиси Александр Турчинов Қримнинг Украина таркибидан чиқиши мамлакатга 100 миллиард доллар миқдорида зарар етказганини таъкидламоқда. Украина раҳбарияти Қримнинг мамлакат назоратига қайтишига ишонмоқда.
Изоҳ (0)