Россиялик журналист Виктор Гусейнов: «Ўзбекистон бозорларида савдолашиб, нархни икки-уч марта пасайтириш мумкин»

Россиянинг «Комсомольская Правда» нашри фотомухбири Виктор Гусейнов Ўзбекистонда бир ҳафта вақт ўтказиб, у ердан олган таассуротлари билан бўлишди.

Муаллиф ўз мақоласида Москвадан Тошкентга етиб келиши билан маҳаллий тамаддихонага кириб ош буюртма қилганини ёзди. «Дўстларимнинг ‘Ўзбекистондагидек мазали таомни ҳеч қаердан топа олмайсан’ деган гапларини ёдга олдим», — дея таъкидлади у.

Мухбир кечки пайт пойтахтдаги Амир Темур хиёбонига ташриф буюрганини ёзар экан,  кечки 11 дан кейин кўчаларда одамларни учратиш қийин эканлигини қайд этди. «Бироқ атроф топ-тоза», — дея қўшимча қилди у.

Муаллиф Тошкент бозорларига бориб, у ердаги нархларнинг пастлигини, бунинг устига, савдолашиб, маҳсулотларни янаям арзонга харид қилиш мумкинлигини кўрганини сўзлаб берди. «Бу ерда ҳар ерда ва ҳар доим савдолашишга одатланишган. Нархларни бемалол икки-уч баробар пасайтириш мумкин», — деб ёзади у.

Шунингдек, меҳмон Бухоро ва Самарқандда ҳам бўлганини ёзиб, у ердаги тарихий обидаларнинг хилма-хиллиги, одамларнинг меҳмондўстлиги, мева-чеваларнинг ширинлиги билан бўлишди.

Сўнг, муаллиф Чимган оромгоҳидаги таассуротлари билан бўлишди. У ерда Чорвоқ сув омборида сузгани, дам олишга келган кишилар уни мазали таомлар билан сийлагани ҳақида тўхталиб ўтди.

Ўзбекистонга саёҳати ҳақида мақоласига якун ясар экан, муаллиф бу ерга ҳафталик туристик саёҳат тахминан 60 минг рубль (4 миллион сўм)га тушишини ҳисоблаб ёзди.