Узоқ тортишувлардан кейин олимлар Россиянинг Ямал яриморолида пайдо бўлган 30 метр диаметрли чуқурнинг сирини очишга муваффақ бўлди. Тадқиқотчиларнинг фикрича, у эриётган абадий музлоқ ерлардан метан отилиши натижасида юзага келган. Бу ҳақда Vesti.ru хабар берди.
Тахминларга кўра, чуқур 2012- ва 2013 йил ёз мавсумларида кузатилган ҳаддан зиёд жазирама билан боғлиқ. Ўша вақтда ҳарорат ўртачадан нақ 5 даражага баланд бўлган. Ҳарорат ошиб боргани сари абадий музлоқ ерлар эриган ва аввал муз ичига қамалиб қолган метан отилиб чиқа бошлаган.
Тадқиқотда иштирок этмаган бошқа бир гуруҳ олимлар иккита жазирама мавсум абадий музлоқни эрита олмаслигини, бунга глобал исишнинг 20 йиллик таъсири сабаб бўлганини таъкидлади.
Тадқиқотчилар ўз назарияларини исботлаш учун чуқурни яна бир бор ўрганиб чиқиши керак бўлади.
Эслатиб ўтамиз, чуқур июль бошларида вертолёт бортидан кўзга ташланган. Қисқа муддатда ОАВларда ҳам, интернет тармоғида ҳам чуқурнинг келиб чиқишига доир турли тахминлар тарқалди. Айримлар чуқур ўзга сайёраликлар мавжудлигидан дарак бераётганини айтган бўлса, бошқа бир фойдаланувчи Россия ўзининг янги оммавий қирғин қуролини синовдан ўтказаётгани ҳақида изоҳ қолдирган.
Изоҳ (0)