«РИА Рейтинг» агентлиги экспертлари 2014 йил бошида МДҲ банк бозоридаги энг йирик 200 та тузилмаларни аниқлади. Активлар ҳажмига қараб МДҲ банкларининг рейтинги тузилди.
Ушбу рўйхатдан Ўзбекистондаги еттита банк ҳам ўрин олди. Чунончи, Ўзбекистон Республикаси Ташқи иқтисодий фаолият миллий банки 5,2 миллиард доллар (2014 йил 1 январь ҳолатига) активлари билан Топ-200 нинг 55-поғонасига жойлашди. Ушбу банк активларининг 2013 йилдаги ўсиш даражаси 7,3 фоизни ташкил қилди. Миллий банкнинг Ўзбекистон банк тизими активларидаги улуши 25,7 фоиздан иборат эканлиги аниқланди.
Ўзсаноатқурилишбанкнинг активлари 3,08 миллиард доллар деб баҳоланди ва 89-ўринга муносиб кўрилди. 2013 йилда банк активлари 21,9 фоизга ўсган, унинг мамлакат банк тизими активларидаги улуши 15,4 фоизни ташкил этди.
Рейтингнинг 118-поғонасидан ўрин олган «Асака» банкининг активлари 2,06 миллиард долларга тенг бўлиб, 2013 йилда унинг активлари 3,2 фоизга камайган. Банкнинг Ўзбекистон банк тизими активларидаги ҳиссаси 10,3 фоизга тенг.
Шунингдек, Ўзбекистонда фаолият юритувчи Ипотека банк (активлари 1,33 миллиард долларга тенг, 155-ўрин), Халқ банки (1,23 миллиард доллар, 166-ўрин), Агробанк (1,15 миллиард доллар, 172-ўрин) ва Қишлоқ қурилиш банки (1,10 миллиард доллар, 177-ўрин) ҳам МДҲдаги етакчи банклар рейтингига кирган.
Рейтингда энг юқори кўрсаткични Россия «Сбербанк»и 2014 йил 1 январь ҳолатига 498,34 миллиард долларлик активлари билан қайд этган бўлса, энг қуйи — 200-ўринни ҳам Россиянинг яна бир банки «Образование» 0,96 миллиард долларлик активлари билан банд этди.
Изоҳ (0)