«Vesti.ru» нашри россияликларни Европа, Осиё, Америка ва ҳаттоки Австралиялик сайёҳларнинг севимли жойига айланиб улгурган Ўзбекистонга ташриф буюришга чақирди ва у ерга саёҳат қилиш учун сабабларни санаб ўтди.
«Ўзбекистондаги баланд миноралар, чирмашиб кетган араб ёзувлари ва мураккаб геометрик нақшлар билан безалган улуғвор мадрасалар Ўзбекистоннинг ташриф қоғозига айланиб бўлган», — деб ёзади нашр аввало ўзбек меъморчилигига тўхталиб ўтар экан. Сайёҳларга саёҳат йўналишини Хивадан бошлаб Самарқандда тугатиш маслаҳат берилди. «Бу йўналишда меъморчиликнинг ёрқинлиги ва нафосати ўсиб боришини сезиш мумкин», — дейилади хабарда.
Бундан ташқари, ҳунармандчилик Ўзбекистоннинг ўзига хос жиҳати сифатида тилга олинди. «Бу ерда ҳар қандай дид ва нархга яраша қўлда ясалган эсдалик совғаларини топиш мумкин», — деб ёзади нашр.
Ўзбек миллий таомлари сайёҳларни ўзига жалб қилувчи яна бир хусусият сифатида айтиб ўтилди. «Ўзбек пазандалиги айсбергининг чўққисида шубҳасиз жаноби олийлари палов туради», — дейилади хабарда. Ҳар бир вилоятда ўзига хос палов ва нон турлари борлиги ҳам тилга олинди. Ўзига хос ўзбек таомларидан татиб кўрмоқчи бўлганларга маслаҳат сифатида тамаддихона ёки ресторанларга эмас, маҳаллий аҳолининг уйига ташриф буюриш кераклиги айтилди. «Ўшандагина сиз димлама, гўжа ва нўхат шўрвадан баҳраманд бўлишингиз мумкин», — дея қўшимча қилинди.
Ўзбекистонда сайёҳларни ўзига тортувчи яна бир омил, дея бозорлар таърифланди. «Савдогарлик ўзбекларнинг қон-қонига сингиб кетган, — деб ёзади нашр . — Замонавий Ўзбекистоннинг ҳар бир фуқароси сал бўлса-да, савдогар». Ўзбек бозорлари фотосуратчилар учун яхши топилма экани ҳам қистириб ўтилди.
Сўнгги саёҳат нуқтаси сифатида Орол денгизига ташриф буюриш маслаҳати берилди. «Мавжуд бўлмаган» денгизни кўриш ва маҳаллий аҳолидан унинг қуриш тарихини эшитиш танловини қилиш-қилмаслик сайёҳларнинг ўзига ҳавола этилди.
Мақола сўнгида Ўзбекистонга ташриф буюриш учун об-ҳаво жиҳатидан энг қулай вақт сентябрь ойи эканлиги таъкидланди. Айнан шу вақтда тўй мавсуми бошланиши, унда қатнашиб бой саргузаштларни бошдан кечириш мумкинлиги айтиб ўтилди.
Изоҳ (0)