Филиппиндаги «Раммасун» тўфони қурбонларининг сони 54 га етди. Шунингдек, архипелагнинг 100 нафар аҳолиси жабрлангани, уч киши эса изсиз йўқолгани маълум қилинди. Бу ҳақда ИТАР-ТАСС хабар берди.
Маълумотларга кўра, тўфон натижасида мамлакатнинг энг кўп аҳоли (17 миллион киши) истиқомат қиладиган жанубий Лусон оролидаги електр тармоғи ишдан чиққан, 26 мингдан зиёд уй харобага айланган. Қишлоқ хўжалик ерларининг минглаб гектари, айниқса, гуруч ва ғалла экилган ҳудуд қаттиқ зарарланган.
Инфратузилма ва қишлоқ хўжалигига етказилган иқтисодий зарар 124 миллион долларга тенг экани аниқланди.
«Рамассун» тўфони сўнгги бир йил ичида Филиппинда содир бўлган энг кучли тўфон деб қайд этилди. Гонконг обсерваториясида тўфон епицентридаги довулли тўлқиннинг тезлиги соатига 205 километрни ташкил этаётгани аниқланиб, унга «супертўфон» мақоми берилди.
Мутахассисларнинг айтишича, тўфон ҳозирда жанубий Хитой ва Гонконг томонга йўл олган. Унинг 18 июль куни Ҳайнан оролига етиб келиши ва бу ерда сўнгги 40 йилда кузатилмаган энг кучли бўронга айланиши тахмин қилинмоқда.
Шунингдек, Гуандун провинцияси ва Гуанси-Чжуан ҳудуди ҳам тўфонга дучор бўлиши мумкин.
Табиий офат Гонгконгга катта хавф туғдирмаётган бўлса ҳам, бу ерда шамол ва денгиз тўлқинларининг кучайиши кузатилмоқда.
Изоҳ (0)