Буюк Британия фуқароси Google қидирув тизими орқали ўзида онкологик хасталик борлигини аниқлади. Бу ҳақда Mirror нашри хабар берди.
Ноттингем графлигидаги кичик шаҳарчада яшовчи 46 ёшли сартарош Кэролайн Гривз бўйнида пайдо бўлган шишлар ва оғиз бўшлиғидаги яралардан узоқ вақт давомида азият чекиб юради. Шифокор бу оддий инфекция эканини айтиб, антибиотик ёзиб беради.
Бироқ дори кор қилавермагач, Кэролайн интернет орқали даволаш усулларини топишга қарор қилади. Касаллиги белгиларини Google қидирув тизимига киритганида, аёл ўзидаги симптомлар саратон хасталигидан дарак беришини аниқлайди.
Гривз хоним маҳаллий клиникадан область шифохонасига йўлланма беришни сўрайди. У ердагилар аёлга бодом бези саратони ташхисини қўяди.
Узоқ вақт давом этган радио ва кимё терапиясидан сўнг айни пайтда Кэролайн ремиссия (касаллик аломатларининг вақтинча заифлашуви) ҳолатига ўтган. Шифокорларнинг айтишича, уларнинг бемори соғайиб кетиш эҳтимоли юқори.
«Google — ажойиб нарса, — деди Кэролайн Гривз. — У тўғри маънода ҳаётимни сақлаб қолди. Мен у орқали касаллигим ҳақидаги мақолани топиб олмаганимда, ҳозир тирик бўлишим амри маҳол эди».
Изоҳ (0)