ФИФА дунё терма жамоаларининг янги рейтингини эълон қилди. Ўзбекистон терма жамоасининг ҳисобидаги очколари 16 тага камайган бўлса-да, жамоамиз 7 поғона кўтарилди ва 52-ўринга чиқиб олди. Бу ҳақда Stadion.uz хабар берди.
Бу ўрин орқали терма жамоамиз яна Осиёнинг учинчи жамоасига айланди. ЖЧ — 2014’да муваффақиятли иштирок эта олмаган қитъадошларимиз рейтингда пастлашди. Япония янги рейтингда қитъанинг энг яхши терма жамоаси бўлиб олди. Японлар 45-ўринни банд этиб туришибди. Янги жадвалда 6 та ўрин пастлаган Эрон 49-қаторни банд этди. Жанубий Корея эса 46 очко йўқотди ва 56-ўринни эгаллаб турибди. ЖЧда барча ўйинларни бой берган Австралия бирйўла 14 поғона пастлади (76-ўрин).
Осиё кубогида Ўзбекистон билан бир гуруҳда ўрин олган Саудия Арабистони 78 (+12), Хитой 94 (+9), КХДР 147 (-1)-ўринларни эгаллаб туришибди.
Рейтингда эса янги пешқадам пайдо бўлди. Жаҳон чемпионлигини қўлга киритган Германия терма жамоаси 1724 очко билан 1-ўринга кўтарилиб олган бўлса, вице-чемпион Аргентина 1606 очко билан 2-ўринни банд этиб турибди. Голландия бирданига 12 поғона кўтарилиб, 3-қаторга чиқиб олди. Колумбия 4 ва Бельгия 5-ўринга кўтарилишди. Анча вақтгача рейтингни бошқариб келган Испания 8-ўринга тушиб кетган бўлса, ЖЧ — 2014 мезбони 7-қаторгача пастлади.
Янги рейтинг билан ФИФА сайтида танишиб олишингиз мумкин.
Изоҳ (0)