Ҳаёл билан суратга олиш ва уни ижтимоий тармоқларга юклаш имкониятини берувчи дастур яратилди

Дастур MindRDR деб номланади ва у ҳаёл билан бошқарилади. Унинг ёрдамида бармоқларни ишлатмасдан суратга олиб, Facebook ҳамда Twitter’га жойлаш мумкин. Бу ҳақда CNN хабар берди.

MindRDR’нинг кенгайтмаси Mind Reader – «ҳаёл ўқувчи» аслида ҳаёлингизни ўқимайди. У Google Glass ва NeuroSky MindWave гаджетларини бирлаштиради.

Бу икки гаджет тақилгандан сўнг, миянинг ҳаракатлари ўлчанади ва Google Glass орқали кўриниб турган манзара суратга олинади. Худди шу каби суратлар ижтимоий тармоққа жойланади.

MindRDR дастурини ишлатиш учун 1500 долларга Google Glass ва 80 долларга NeuroSky MindWave гаджетларини сотиб олиш керак бўлади.

Дастур Лондонда жойлашган This Place компанияси томонидан яратилган ва уларнинг фикрига кўра, MindRDR суст ҳаракат қобилиятига эгалар учун фойдали бўлади.