Facebook блокланган смартфон экранида билдиришномаларни кўрсатиш функциясини синамоқда

Facebook ижтимоий тармоғи айрим Android фойдаланувчиларида янги функцияни синовдан ўтказмоқда. Бу ҳақда TechCrunch сайти хабар берди.

Синовдаги функция Android операцион тизимининг янги версияси — Android L’да ишлаши аввал хабар қилинган экран қулфланган пайтда ҳам билдиришномаларни қабул қилиш функциясига ўхшайди.

Facebook ишлаб чиқаётган янги функция барча Android версиялари учун мўлжалланади. Шу боис у Android L’даги ўхшашидан кўра яхшироқ бўлади.

Facebook бу функцияни кичик гуруҳларда текширувдан ўтказаётганини тасдиқлаган бўлса-да, бироқ батафсил маълумот ошкор қилинмаган.

Экран қулфанган пайтда келган билдиришномаларни ўқиш учун унинг устига босиш ва экран қулфини очиш керак бўлади. Агар ўқиш зарур деб билинмаса, у ҳолда хабарни экран четига силжитиб юбориш ва экранни қулфланган ҳолатда қолдириш мумкин.